ESE MULAYIKI, UHAGAZE HE MU BUTUMWA BWAWE

Ubwo abalayiki bizihizaga umunsi mukuru wabo ejo ku cyumweru tariki ya 08/11/2020, Kiliziya yabashishikarije kutagira ubwoba no kuba maso. Uwo munsi mukuru wabo wasanze abalayiki bamwe badashobora kwinjira muri Kiliziya zabo, kuko hamwe na hamwe zigifunze, kandi n’aho zafunguwe, umubare w’abemerewe kujya mu misa ku cyumweru nturenga icya 1/2 cy’imyanya buri kiliziya ifite, iyo ni imwe mu ngamba zinyuranye zo kwirinda icyorezo cya COVID-19. Ibi byatumye Komisiyo y’itangazamakuru muri paruwasi ya Gikondo yifuza kumenya aho abalayiki bahagaze muri iki gihe, iganira kuri telefoni na Bwana Nshimiyimana Alphonse, ukuriye S/Komisiyo y’abalayiki muri Paruwasi ya Gikondo. Mu byiciro bitatu  yadushyizemo wowe waba uri mu kihe?

Nyuma yo kumva ubutumwa Komisiyo y’Abepiskopi Ishinzwe Abalayiki  bwasomwe mu misa eshatu  twemerewe kugeza ubu,  komisiyo y’itangazamakuru muri paruwasi yaganiriye na Bwana Nshimiyimana Alphonse uhagarariye abalayiki ayibwira uko abona abalayiki bahagaze muri paruwasi:

Kom. Itangazamakuru: None twizihije umunsi Mukuru w’abalayiki muri Kiliziya y’u Rwanda, ukurikije ibihe bya COVIDE-19 twabayemo kandi tugikomeza kubamo, i Gikondo ubona abalayiki duhagaze dute? Bibaye ngombwa ko dushyirwa mu byiciro, ni ibihe byiciro wadushyiramo?

Mu mwanya w’inyigisho hasomwe ibaruwa y’Abepiskopi. Aha Bwana Alphonse niwe uyisoma.

NSHIMIYIMANA Alphonse: Nsanga bamwe mu balayiki bari bakomeye bararushijeho gukomera kuko akaga katewe na Covid-19 kabafashije kuzirikana bihagije ku mwanya n’ubutumwa bafite muri kiliziya. N’ubwo  kiliziya yari igifunze, abo bakomeje kwitanga mu bikorwa binyuranye no mu masengesho bakorega iwabo mu ngo zabo. Iki cyiciro kandi cyagaragayemo n’abakristu bakomeje kwibutsa abandi inshingano bafite muri paruwasi, ku buryo bw’umwihariko iwacu i Gikondo bashishikariza abandi gukomeza ibikorwa twari twaratangiye.

Hari kandi n’abandi barushijeho gukonja ntibagaragare cyane, ariko wababwira bakumva.

Hari rero n’icyiciro cya gatatu cy’abakristu batakibuka rwose gahunda za kiliziya, yewe batanibuka ko umunsi w’icyumweru wageze,  kuko mu mitwe yabo kiliziya zirafunze. Aba banyuma ariko n’ubundi ni ba bandi bari basanzwe bacumbagira ku buryo imiryangoremezo tugize amahirwe igakomorerwa, amasangirabuzima agasubukurwa nibo twaheraho dushishikariza kwitabira ikoraniro.

Wikivutsa amahirwe usiba misa, umwanya wawe urateganyijwe

Ingamba zo kwirinda COVID19 ntizikubere umuzigo, abandi barazimenyereye

« Ukwemera kutagira ibikorwa kuba kwarapfuye »

Bwana Alphonse yashimye abalayiki bagaragaje ishyaka n’urukundo cyane cyane igihe igihugu cyose cyari muri gahunda ya « guma mu rugo ». Yagize ati: ” Abalayiki ariko na none bagaragaje ishyaka n’urukundo bafitiye kiliziya ubwo caritas yatabarizaga abavandimwe bacu batari bafite amikoro ahagije mu gihe cya guma mu rugo. Kandi turanashimira abayobozi b’imiryangoremezo n’ab’impuzamiryangoremezo bakomeje gahunda yo kwibutsa no gushishikariza abakristu gutanga ituro risanzwe rya kiliziya n’umuhigo w’itafari ryo kubaka kiliziya yacu”.

Ubuhamya bw’ukwemera: Kuva mu rugo uzanywe no gukora ku rugi rwa kiliziya cyangwa kuyegamaho ugataha wishimiye ko wahuye na Yezu.

Aba bati « guhana intera no kwambara neza udupfukamunwa twacu ntibihungabanya ibyishimo byo kuba turi abalayiki « 

Bwana Alphonse asoza ikiganiro twagiranye yatanze ubuhamya bw’agashya mu kwemera, ati: ” Agashya nabonye kanyeretse ko ukwemera guhamye;  ni abantu bajyaga bomboka igihe abandi twari muri guma mu rugo, bakagenda bagakora ku muryango wa kiliziya cyangwa bakayegamaho, barangiza bagataha bumva banezerewe ndetse bahamya ko bahuye na Yezu rwose. Simbavuze amazina ariko ni ubuhamya bukomeye.”

« Nimuhumure, Nijye, Mwigira ubwoba… »

Kuri ibi byiciro byose uko ari bitatu, Abepisikopi  barabwira abalayiki babo bati « Nimuhumure » Ubutumwa bwabo burongera guha buri wese icyizere; icyizere cy’uko abakomeye ku kwemera kwabo bagakomeza kugashya barwana n’imivumba y’umuhengeri wa COVID bataruhiye ubusa. No ku bari mu bindi byiciro nabo, iri jambo rirabahumuriza kuko  ribamenyesha ko hari uje kubatabara bose. Nk’Uko Yezu yahumurije abigishwa be bose bari mu bwato, ntawe abanje gucira urubanza cyangwa kunenga.  N’umubyeyi wacu Kiliziya iradusanze, buri wese mu cyiciro arimo, iti :«Nimuhumure! »

Iri jambo « Nimuhumure » ku balayiki baranzwe n’ibikorwa by’ukwemera birimo na turiya dushya twumvise, rituma na none bumva bafite ishema, rikabaminjiramo ishyaka ridakama ryo gukomezanya ubutwari ibyo bikorwa nk’ibyo. Ribumvisha ariko ko batari bonyine, ko iruhande rwabo hari undi muntu kandi ubarusha imbaraga, ukurikirana ibyo bakora kandi ubishima akabarwanirira, si ku bwabo rero. Ibyo bituma na none barushaho gusabwa n’ibyishimo nk’uko bariya  twumvise bavaga iwabo bazanywe gusa no gukora ku rugi rwa kiliziya cyangwa kwegama ku rukuta rwayo, hanyuma basubirayo bishyimiye ko bahuye na Yezu. Iri jambo « Nimuhumure » rirema agatima n’abatagaranye batagifite ishyaka. Ntiribacira urubanza, ntiribigizayo ngo ribaheze. Ribaremamo nabo izindi ngufu n’icyizere, kugira ngo batagira ipfunwe ryo kuba baritwaye nk’abatose kurusha abandi kandi imvura yabanyagiye ari imwe.  Nabo rero ubu butumwa burababwira  ngo: « Nimuhumure! »

Mwigira ubwoba

Irindi jambo rikomeye muri ubu butumwa ni iri: « Mwigira ubwoba ». Ni ijambo ryenda gusa n’irya mbere ariko ryo riradusaba gutinyura, guhagarara no kureka gukomeza kujya kure y’uje atugana kugira ngo aturohore, anaturokore. Mwiherenwa n’ubwoba bwa COVID 19, maze ngo mukomeze no guhunga uje ashaka kubakiza. Koko rero, kuva aho iki cyorezo cyadukiye, abantu bose batashywe n’ubwoba. Noneho kuva n’aho kiliziya zifungiwe barushaho kwiheba, ku buryo n’igihe kiliziya zimwe zifunguriwe, batibutse kwiruka bazigana. Abepisikopi bacu  barababwira bati :” Mwigira ubwoba!”.

Ijambo rya nyuma dusanga muri ubu butumwa ni « ukuba maso ». Kuba maso si ugukanura , kuko n’ubusanzwe  tuzi ko « imitunu y’urukwavu itabuza ishyamba gushya ».

Mube maso

Kuba maso hano bisobanura kugira ubwenge, kumenya gushishoza no kumenya gusoma ibimenyetso by’ibihe turimo kugira ngo hatagira ibidutungura. Ikibazo gihari ni uko muri iki gihe isi ifite ibintu byinshi bishashagirana biduhuma amaso. Kuba maso rero icyo gihe ni ukuba umunyabwenge, ukamenya ko imbere y’ibyo bishashagirana akenshi binaduhuma amaso, tugomba kumenya gushaka amadarubindi agabanya abukana bw’ibyo bishashi bituma tugenda buhumyi, tugateshwa inzira y’Ukuri.

 

Isomere ubutumwa bwose bugenewe abalayiki

 

Umunsi w’Abalayiki 8.11.2020 ik

Andi mafoto y’icyumweru

 

HABUMUKIZA Joseph

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *